2 nilikida sa Caloocan
MANILA, Philippines — Dalawang bangkay ng lalaki na biktima ng ‘summary execution’ ang pinagbabaril at napatay sa tabi ng isang subdibisyon sa Caloocan City, kahapon ng madaling araw.
Nagtamo ang mga biktima ng tama ng bala sa ulo at katawan. Isa ang inilarawan na nakasuot ng puting basketball uniform at itim na short pants habang ang isa ay nakasuot naman ng berdeng t-shirt at pulang jogging pants.
Sa imbestigasyon ng pulisya, dakong alas-4 ng madaling araw nang makita sa footage ng closed circuit television camera (CCTV) ang paghinto ng isang sasakyan sa tapat ng Dela Costa Subdivision II sa may Quirino Highway, ng naturang lungsod.
Dito pinababa ng sasakyan ang dalawang biktima at saka pinagbabaril ng mga salarin bago tumakas lulan ng behikulo.
Narekober ng mga tauhan ng Scene of the Crime Operatives (SOCO) ang isang piraso ng cartridge buhat sa isang kalibre .9mm na baril.
Patuloy naman ang masusing imbestigasyon ng pulisya sa insidente at masusing nirerebisa ang kuha ng CCTV camera upang matukoy ang pagkakakilanlan ng mga salarin.
- Latest
