Suhulan sa towing hahalukayin ng MMDA
MANILA, Philippines — Nagsasagawa ng malalimang imbestigasyon ang Metropolitan Manila Development Authority (MMDA) sa mismong bakuran nito makaraang mabulgar ang nagaganap na pagbibigay ng porsyento ng mga towing companies sa mga tiwaling tauhan ng ahensya na hinihinalang ugat ng mga pag-abuso sa paghatak sa mga sasakyan.
Nitong nakaraang Biyernes, nagsagawa ng illegal parking operation ang “Special Task Force” ni Supervising Officer Edison Nebrija sa Timog Avenue sa Quezon City. Isang tawag ang natanggap ni Nebrija sa isang concerned citizen ukol sa isang towing crew na hinahatak ang isang puting kotse nang walang kasamang enforcer.
Nang puntahan at kausapin ni Nebrija, inamin ng isa sa mga crew na nagbibigay sila ng P200 kada hatak nila sa umano’y “dispatch” ng MMDA. Inamin din ng enforcer na pinakakain sila ng pananghalian ng mga towing company bagama’t itinanggi na may porsyento sila sa towing.
Nakatakda namang isumite ni Nebrija ang kanyang ulat ngayong Lunes kay MMDA Assistant Manager for Operations Ret. Gen. Roberto Almadin para sa isang masusing imbestigasyon sa natuklasang anomalya.
Nilinaw ni Nebrija na bawal at walang polisiya ang MMDA sa pagtanggap ng P200 ng kanilang ‘dispatch’ buhat sa mga towing companies na kanilang hahalukayin ngayon at aalamin ang mga taong nasa likod nito.
- Latest