Kelot itinumba sa pagbebenta ng pekeng shabu
MANILA, Philippines — Patay na nang matagpuang nakahandusay ang isang dati umanong drug courier nang muling bumalik sa lugar kung saan siya ay may nakaaway dahil sa pagbebenta umano ng pekeng shabu sa Port Area, Maynila, kahapon ng madaling araw.
Kinilala ang nasawi na si Danilo Yap, tinatayang nasa 25-30 anyos, dating residente ng Vargas Compound, 2th Street, Brgy. 650 Port Area, Maynila at sinasabing nakatira na ngayon sa Baseco Compound.
Sa ulat ni PO3 Ryan Jay Balagtas ng Manila Police District-Homicide Section, nadiskubreng patay ang biktima alas-12:10 ng madaling araw kahapon sa Vargas Compound, 12th Street, Port Area,
Sa dami ng mga residente at taong nakakakilala at usisero, wala umanong nais magbigay ng pahayag kaugnay sa insidente maliban sa naging salaysay ni Rodolfo Trono, 71, Brgy. 650 Executive Officer na nagsabing kilala niya na dating constituent ng kanilang lugar si Yap at naging matunog umano ang pangalan nito bilang ‘drug courier’. Noong taong 2015 ay lumipat ito ng tirahan sa Baseco Compound dahil sa mga nakaalitan hinggil sa pamemeke ng ibinebentang shabu.
Kamakalawa ng gabi, huli pa niyang nakitang buhay si Yap na nakikipag-inuman sa ilang kalalakihan sa isang sari-sari store sa 12th Street panulukan ng Railroad St., at nagulat na lang nang may magbalita na binaril ito.
Inaalam pa kung ang dating mga kaalitan ang sangkot sa pamamaslang.
Nagtamo ng tama ng bala sa ulo, mukha, dibdib at kaliwang kamay ang biktima na nagsanhi sa kanyang kamatayan.
- Latest