Kelot sisilbihan ng warrant, bulagta matapos manlaban

MANILA, Philippines - Patay ang isa umanong lalaki makaraang manlaban sa mga umaarestong mga operatiba ng Quezon City Police District (QCPD) habang isinisilbi sa kanilang magkapatid ang isang warrant of arrest sa kasong physical injuries      sa Brgy. Pasong Tamo, sa lungsod, kamakalawa.

Sa ulat kay QCPD Director P/Chief Supt. Guillermo Eleazar, ang nasawi ay nakilalang si Vivencio Serabia,  residente sa Sto Niño St., Burauen Leyte. Habang nakatakas naman ang kapatid nitong si Marlon Serabia.

Base sa imbestigasyon, nangyari ang insidente sa may Ilang-Ilang St., Pingkian 2, Zone 2, Brgy. Pasong Tamo, QC, dakong alas-6:20 ng gabi.

Bago ang insidente,  sa pangunguna ni P/Supt. Alex Alberto at District Special Operation Unit (DSOU) ng QCPD nagsagawa ng operasyon ang mga ito laban sa mga suspek bitbit ang isang mandamyento de aresto na ipinalabas ni Judge Jate Abergos, presiding judge ng MTC branch 32, QC, sa kasong physical injuries.

Subalit, pagdating ng mga operatiba sa nasabing lugar biglang pinaputukan ng mga suspek ang mga una dahilan para mauwi sa palitan  ng putok hanggang sa tamaan si Vivencio at bumulagta. Agad namang tumakas si Marlon ng makita ang pagbagsak ni Vivencio. Siya ngayon ay pinag­hahanap ng batas.

Sa pagsisiyasat ng Scene of the Crime Operatives (SOCO) sa crime scene narekober ang isang kalibre.9mm na baril,  pitong basyo ng bala, isang kalibre. 22 rifle air gun, isang basyo ng kalibre .45, isang basyo ng kalibre 5.56.

Patuloy ang imbestigasyon ng otoridad sa nasabing insidente.