Bumbero gagawing traffic enforcers ng MMDA
MANILA, Philippines – Dahil sa patuloy na kakapusan sa mga traffic enforcers, plano na rin ng Metropolitan Manila Development Authority (MMDA) na i-deputize ang mga fire volunteers para makatulong sa pagmamando ng trapiko sa Metro Manila.
Sinabi ni MMDA spokesperson, Celine Pialago na nag-commit na sa kanila ang iba’t ibang fire volunteer groups para tumulong sa trapiko ngunit tuwing weekends lang o mula Biyernes hanggang Linggo dahil sa may iba pa naman silang responsibilidad. Nasa 300 fire volunteers umano ang maaaring madagdag sa mga kalsada ng Metro Manila kapag natuloy ito.
Idinagdag ni Pialago na inaayos pa lamang sa kasalukuyan ang implementing guidelines kung ilang oras at kung magkano ang matatanggap ng mga fire volunteers na magiging traffic constables. Itatalaga ang mga fire volunteers sa EDSA at Mabuhay Lanes na nangangailangan ng dagdag na tauhan.
Tiniyak naman niya na pagmamando lamang ng trapiko ang tututukan ng mga fire volunteers habang ang panghuhuli ay mananatili sa mga MMDA enforcers na opisyal na may hawak na mga paniket.
Nabatid na ang ideal na bilang ng enforcers para magmando ng trapiko sa Metro Manila ay 5,000 ngunit sa kasalukuyan ay may 2,800 enforcers lamang ang MMDA. Unti-unti pang nababawasan ang mga ito dahil sa pagkakasibak ng ilan na nasasangkot sa iba’t ibang kaso ng pangongotong at iba pang pag-abuso sa tungkulin.
Ayon sa MMDA, karamihan sa mga enforcers ay mga “job-orders” lamang kaya kapag nasangkot sa insidente ng kotong o ibang pag-abuso ay mabilis na nasisibak sa trabaho.
- Latest
