Rali ng mga taga-suporta ni Poe tatagal hanggang Disyembre 10

MANILA, Philippines – Tiniyak ng mga taga-suporta ni Senator Grace Poe na araw-araw silang magsasagawa ng  kanilang  rally sa harap ng Palacio de Gobernador upang kondenahin ang  umano’y pagdiskuwalipika ng Commission on Elections  (Comelec) sa kandidatura nito.

Suot ang puting t-shirt, sinabi ng mga taga-suporta ni Poe na layon ng kanilang pagra-rally  na maliwanagan ang Comelec, patakbuhin  si Poe at bawiin ang kanilang  desisyon.

Martes nang ibaba ng  Comelec 2nd Division ang  kanilang desisyon  kay Poe na nagsasaad na  hindi ito maaaring tumakbo sa pagkapangulo dahil na rin  sa pagiging hindi natural born Filipino.

 Ang desisyong ibinaba  ng Comelec 2nd Division ay sa petisyon ni Atty. Estrella Elamparo. Tatlo pang  petisyon naman ang nakabinbin sa 1st Division ng Comelec.

Nabatid na nasa 1,000 supporters ang sumugod kahapon sa harap ng tanggapan ng Comelec upang ipanawagan na payagang  makatakbo sa 2016 presidential elections si Poe.

Samantala, nagpahayag naman ng kalungkutan si Manila Mayor Joseph Estrada sa diskuwalipikasyon ni  Poe na kanyang inaanak.

Umaasa si Estrada  na malalabanan ni Poe ang  kinakaharap na  problema at  kontrobersiya kung saan  mababaligtad ito ng Korte Suprema.

Sakali umanong madiskuwalipika si Poe ng tuluyan at makulong si Vice President Jejomar Binay mapipilitan siyang tumakbo sa pagkapangulo.