Produktong petrolyo, muling magtatapyas ng presyo
MANILA, Philippines - Inaasahang muling magtatapyas sa presyo ng kanilang mga produktong petrolyo ang mga kompanya ng langis sa darating na linggo.
Kinumpirma ni Energy OIC Secretary Zenaida Monsada na may inaasahang roll back sa susunod na linggo. Bagama’t tumanggi naman itong magbigay ng eksaktong numero, mababa anya sa piso ang maaaring itapyas sa presyo.
Kung matutuloy, ito na ang pang-walong pagbaba sa presyo ng petrolyo sa sunud-sunod na linggo at umaabot na sa P4.40 na ang kabuuan na ibinaba ng presyo ng diesel samantalang P3.55 naman sa gasolina.
Paliwanag pa niya, mabilis umano ang paglaki ng supply kumpara sa demand.
Hindi na anya ganoon kalaki ang inaangkat na langis ng America, na siyang pinakamalaking konsyumer ng langis sa mundo, dahil sa unti-unti nang dumarami ang small-time producers ng langis doon.
Puna ni Monsada, kapag nagtaas ng presyo ang langis, sumusunod din sa pagtaas ang ibang bilihin, subalit ngayong bumababa ang presyo ng langis, nananatili pa rin ang presyo ng mga kalakal. (Lordeth Bonilla)
- Latest
