Marupok si Gurl!

Dear Tito Miguel,

Maayong adlaw,Tito Miguel! Maglagot ko aning akong ex,imbes naka move on nako, mo chat og kalit, magsige'g pamantay nako. Makig chika-chika. Ingon akong friends, dapat dili nako mo-reply aron dili siya mogara. Pero marupok man ko,maka-reply gyud ko. Dili pa nako kaya i-block. Pero naa naman siya’y lain. Tambagi ko please. — Gummy

Gummy,

Wala’y dautan sa inyong chat-chat kun pareha mo single. Mahimo unta ninyo hataga’g laing higayon inyong relasyon bisan pa ikaw naka move-on. Apan sa tinuod wala pa ka hingpit nga nakalimot niya kay nganong sa pag-block dili man nimo kaya? Apan kay naa na man siya’y lain, unsa pa man inyong balikan sa kaniadto nga wa na man untay nahabilin? Kun buot hunahunaon, wala siya’y respeto nimo ug sa iyang bag-ong uyab mismo. Kay ang pakig-chat labi na sa ex usa ka matang sa pagpangbudhi ngadto sa iyang present. Posible mangatarungan mo nga chat ra bitaw apan ang tanan nagsugod sa istorya hangtod sa himaya o disgrasya. Sa imong pagsakay-sakay niya lagmit layo na’g maabtan inyong pagsinukliay. Kun inyong istorya walay malisya, suway mugna’g chat group kuyog iyang uyab karon. Dili mahimo no, kay naa moy gitago.

Apan labaw sa tanan, ikaw mismo sa imong kaugalingon walay respeto. Kahibawo ka naa siya’y lain, apan nanaginot gihapon ka’g namasin. Posible masulob-on lang ka sa imong pag-inusara busa bahala’g ikaw gitiaw-awan ra, nalingaw gihapon ka. Ubos imong panan-aw sa imong kaugalingon, busa imo siyang gitugtan nga imong dignidad tumban. Ayaw katagbaw nga himuon ra kang kalingawan. Pagpaabot og lain nga ikaw ang bugtong gimahal ug gipasigarbo, dili kay kinawat ug gitago kay dunay laing nanag-iya. Sa una number one o the only one ka niya. Apan karon dili gani ka ikaduha. Wa gyud kay apil sa kuwentada. — Tito Miguel

Magpatambag ka? Ipada kang Tito Miguel: 0998-581-5856