Gaganti o Karma na lang?

Dear Dr. Love,

Ako po si Daks, 26 anyos, taga-Caloocan. Isa po akong tahimik na tao pero loyal pagda-ting sa relasyon. May tatlong taon na po kaming magkarelasyon ng ex ko na si Alyssa. Sa totoo lang, plano ko na po sana siyang pakasalan sa loob ng dalawang taon. Pero isang araw, bigla na lang siyang lumamig, naging mailap, at laging may dahilan para hindi kami magkita.

Hanggang sa isang gabi, nakita ko sa social media na may kasama na siyang iba. Ang masakit, ang kasama niya…ang matalik kong kaibigan, si Ruel. Kaibigan kong tinulungan ko sa lahat—sa pera, problema, pamilya, at pati sa pag-ibig noon! Kung tutuusin, ako pa ang nagpakilala sa kanila sa isa’t isa.

Dr. Love, galit na galit ako. Hindi lang sa kanila, kundi pati sa sarili ko. Pakiramdam ko, niloko ako nang harap-harapan. Ang sakit! Lalo na’t si Ruel pa ‘na halos itinuring kong kapatid.

Hindi ako makatulog, hindi makakain. May mga araw na naiisip kong gumanti. Gusto kong ipatikimin kay Ruel ang sakit na nararamdaman ko ngayon. Gusto kong saktan siya. Hindi pisikal, pero alam mo ‘yung tipong mawala rin sa kanya si Alyssa at maramdaman niya kung paano masira ng isang tao ang tiwala niya?

Pero naiisip ko rin, kung gagawin ko ‘yon, magiging kagaya ko lang din sila. At sa totoo lang, hindi naman na babalik si Alyssa. Pero hirap pa rin akong palayain ang galit.

Dr. Love, anong dapat kong gawin? Tama bang gumanti o hayaang karma na lang ang bahala? 

Paano ko matutulungan ang sarili kong makalimot at magmahal ulit kahit parang wala na akong tiwala sa pagkakaibigan at pag-ibig?

Daks

Dear Daks,

Una sa lahat, ha-yaan mong yakapin kita sa pamaamagitan ng sulat na ito. Ramdam ko ang bigat ng sakit na nararamdaman mo. Ang pagkakanulo ng isang minamahal ay masakit, pero kung galing pa ito sa isang taong itinuring mong kaibigan—ibang klaseng sugat ‘yan.

Pero anak, sa kabila ng kirot, gusto kong purihin ka. Kasi kahit gusto mong gumanti, pinipigilan mo pa rin ang sarili mo. Ibig sabihin, mas matatag ang prinsipyo mo kaysa sa galit. Hindi lahat ng tao may ganyang disiplina

Anak, ang paghihiganti ay parang pag-inom ng lason na umaasang ‘yung kaaway mo ang mamamatay. Sa huli, ikaw pa rin ang talo. Mapupuno ka ng galit, mawawala ang kapayapaan mo, at pati mga taong tunay na nagmamahal sa’yo, maaapektuhan.

Oo, may karma. At hindi mo kailangang maging tagapaghatid nito. Ang tunay na ganti ay ‘yung tahimik mong pagbangon—ang ipakita sa kanila na hindi nila winasak ang pagkatao mo, kundi mas lalo kang tumibay.

Patawarin mo hindi dahil deserve nila—kundi dahil deserve mong matahimik.

DR. LOVE