Multo ng nakaraan
Dear Dr. Love,
Hindi ko alam kung paano ko sisimulan ang aking liham dahil tuwing maaalala ko ang nangyari sa unang taon ng aming pagsasama ng aking asawa ay naaalibadbaran ako sa aking sarili.
Tawagin mo na lang akong Regine, 30-anyos, may asawa at tatlong anak. Five years na nang maging rape victim ako ng nakababatang kapatid ng aking mister, na nagbakasyon lang sa amin.
Wala noon ang mister ko at kaming dalawa lang sa bahay. Malaki at maskulado siya kaya wala akong nagawa kundi umiyak. Duda ko nga, sa kanya ang panganay ko’ng anak.
Siguro, niloob ng Diyos na mamatay sa road accident ang kapatid ng asawa ko, isang linggo matapos ang ginawa niya sa akin.
Matapos ang limang taon, wala pa ring alam sa nangyari ang mister ko. Pero nakokonsensya ako. Dapat ko ba itong sabihin sa kanya?
Regine
Dear Regine,
Minsan may mga pangyayari na mas mabuting manatiling lihim kung ito’y magbubunga ng kaguluhan sa buhay. Hindi mo gustong maging biktima ng rape kaya wala kang kasalanan na dapat pasanin ng iyong budhi.
Matagal na ring patay ang humalay sa iyo, kaya tanging ikaw na lang ang nakakaalam sa nangyari. Huwag mo nang hayaang mabunyag pa ito dahil kung magkagayon, kahit patay na ang kanyang kapatid ay magtatanim ng poot ang iyong asawa sa kanya at baka pati ang ninyong anak ay madamay.
Inuulit ko, huwag mo nang gawing pabigat sa iyong dibdib ang nakaraan dahil wala kang pagkakasala.
Dr. Love
- Latest