Hatol kay VP Sara posibleng ilabas bago mag-Disyembre – Gatchalian

MANILA, Philippines — Posibleng magkaroon ng hatol sa impeachment trial ni Vice President Sara Duterte bago mag­Disyembre, ayo kay Senate President Win Gatchalian nitong Miyerkules.

“Hopefully, before December, matapos na natin. Hopefully, ha? May verdict,” ani Gatchalian.

Sinabi ni Gatchalian na nakadepende pa rin ang target na ito sa bilang ng mga testigong ihaharap ng prosekusyon at depensa. Pero binanggit din niyang nagkaroon ng pagkakataon na mapabilis ang paglilitis dahil sa desisyon ng prosekusyon na bawasan ang kanilang mga testigo.

Sinabi niyang ang buong araw na mga pagdinig ay magsisimula ng alas-10 ng umaga at magpapatuloy hanggang matapos ng korte ang mga gawain nito para sa araw na iyon.

Sinabi rin niyang umaasa ang impeachment court na makapagharap ng dalawa hanggang tatlong testigo sa isang araw kapag nagsimula na ang buong araw na pagdinig.

Gayunman, sinabi ni Gatchalian na nakadepende pa rin ang magiging bilis ng paglilitis sa depensa kapag nagsimula na itong magharap ng sarili nitong mga testigo matapos makumpleto ng prosekusyon ang paglalahad ng ebidensiya nito kaugnay ng apat na artikulo ng impeachment.