‘Panda, Pusa at Maching’: 1,685 benepisyaryo ng confidential funds, walang rekord sa PSA
MANILA, Philippines — Ibinunyag ng Philippine Statistics Authority (PSA) na 1,685 sa 2,669 recipients ng confidential funds ng OVP at DepEd noong 2022–2023 ay walang rekord ng kapanganakan, kasal, o pagkamatay sa civil registry.
Sa testimonya ni Assistant National Statistician Marizza Grande, lumitaw na kabilang sa mga pangalang nakalista sa liquidation documents ang mga indibidwal na hindi matunton sa PSA database — kabilang ang mga bata at matagal nang patay.
Bukod kay Mary Grace Piattos na walang anumang rekord sa PSA, nakita rin ang mga pangalang Arthur Baon, Beverly Claire Pampano, Matthew Keso, Charles Sampaloc Jr., Timon Pusa, Tomas Panda, Maxine Callos – lahat walang kapanganakan, kasal, o pagkamatay na nakatala.
Ipinakita rin sa mga acknowledgment receipt na iniharap sa paglilitis na may mga indibidwal na walang rekord sa civil registry na tumanggap ng malalaking halaga mula sa confidential funds ng OVP.
Kabilang dito si Danrick Otso, na sinasabing tumanggap ng P500,000; Matthew Keso, P250,000; Tina Maching, P250,000; Xiame Otso, P100,000; at Timon Pusa, P100,000.
Kinumpirma rin ng prosecution na 25 pangalan sa liquidation records ay mga bata, tatlo sa kanila ay wala pang tatlong taong gulang.
Ayon kay Grande, may 152 entries na iisang katugmang rekord lamang ang lumabas sa Civil Registry System, habang may mga acknowledgment receipt na tumutugma sa marriage certificates pero hindi umano tugma ang mga lagda.
Si Duterte, na nagsilbing DepEd Secretary mula 2022 hanggang 2024, ay naglaan ng P112.5 milyon confidential funds sa DepEd at P500 milyon sa OVP.
- Latest
