Palasyo sa Australia trip ni VP Sara: ‘Pang personal o pang bayan?’
MANILA, Philippines — Kinuwestyon ng Malakanyang kung personal o para sa bayan ang pagbiyahe ni Vice President Sara Duterte sa Australia.
‘’Pang personal o pang bayan? That is the question,” reaksyon ni Palace Press Officer Undersecretary Atty. Claire Castro kaugnay sa panibagong biyahe ng Bise Presidente sa Australia.
Sa abiso ng Office of the Vice President (OVP) kahapon, sinabi nito na kasama sa magiging itinerary ni VP Sara sa kanyang biyahe ang pagdalo sa “Free Duterte Now” rally sa Linggo, Hunyo 22, na idaraos sa Melbourne.
Sinabi pa ni Castro na lumalabas na personal ulit ang biyahe ng Bise Presidente at inisa-isa ang mga naging biyahe nito kabilang na ang pag-celebrate ng kaarawan sa Netherlands noong May 29, 30 at 31.
Bukod pa ang biyahe nito sa Qatar at Kuala Lumpur, Malaysia kaya lumalabas na apat na beses umalis ng bansa ang VP sa halos ilang buwan lamang.
“So, kung doon po abala ang ating Bise Presidente sa mga personal trips niya o personal trips with her family, choice po ng Bise Presidente iyon. Sabi nga natin, pampersonal o pambayan, that is the question. So, wala po tayong masasabi,” ayon pa kay Castro.
Kung anuman aniya ang ginagawa ngayon ng Bise Presidente ay nakikita naman ito ng taumbayan bilang isang halal na lider ng bansa.
Nilinaw naman ni Castro na walang nilalabag ang Bise Presidente maliban na lamang sa kanyang obligasyon sa bayan.
- Latest
