Pangulong Marcos: NCAP bawas Korapsyon
MANILA, Philippines — Nagpahayag ng suporta si Pangulong Ferdinand Marcos Jr. sa No Contact Apprehension Policy (NCAP) na ipinapatupad ng Metropolitan Manila Development Authority (MMDA).
Sa podcast interview ni Marcos, sinabi niya na maganda ang layunin ng NCAP dahil madidisplina ang mga pasaway na motoristang sumunod sa batas trapiko at mababawasan din ang korapsyon.
Taliwas aniya ito sa pananaw ng ilang motorista na magiging gatasan lang ng mga pulis at traffic enforcer ang NCAP.
“In principle agree ako diyan sa no contact. Maganda ang layunin n’yan, yung masunod ang rules of the road na hindi tayo kung anu-anong ginagawa natin and then bawas corruption,” pahayag ng Presidente.
Kapag aniya nahuli ng pulis ang isang motorista, aminin man o hindi ay may nakasiksik na pera sa lisensiya para hindi na matiketan kaya mas maganda ang NCAP dahil ang paglabag ay ibabase sa nakunan sa CCTV.
Paliwanag pa ng Pangulo, kapag nagbayad ng multa ay hindi tao ang tatanggap kundi diretso mismo sa sistema.
“Ito it will be based solely kung ano yung nasa picture. Pag babayad siya ng multa hindi binibigay sa kahit na anong tao. It’s straight to the system,” sinabi pa ng Pangulo.
- Latest
