Paglikas sa OFWs sa Middle East ikinakasa

Israel-Iran crisis tumitindi

MANILA, Philippines — Itinaas na ng Department of Migrant Workers (DMW) sa heightened alert status ang kanilang mga tanggapan sa Middle East dahil sa lumalalang tensyon sa pagitan ng Israel at Iran.

Sinabi ni DMW Undersecretary Bernard Olalia sa Saturday News Forum sa Quezon City, na mismong si Pangulong Ferdinand Marcos Jr. at DMW Secretary Hands Leo Cacdac ang nag-utos nito.

“Naka-heightened alert po ngayon ang DMW. Lahat ng front offices, lalo na ang ating Migrant Offices sa Israel, Jordan, Lebanon at iba pang bansa sa Gitnang Silangan, ay nakaalerto dahil sa kaguluhan sa rehiyon,” sinabi pa ni Olalia.

Handa na rin aniya ang DMW at ang Overseas Workers Welfare Administration (OWWA) sakaling lumala pa ang sitwasyon at mag-escalate ang kaguluhan at lumawak ang regional conflict.

“Hindi lang aniya Israel at Iran ang binaban-tayan natin kundi lahat ng bansa sa Gitnang Sila­ngan,” dagdag pa ni Olalia.

Ayon sa DMW, tinatayang 20,000 Pilipino ang kasalukuyang nasa Israel—13,000 dito ay dokumentado, habang mahigit 6,000 ang walang kaukulang papeles kung saan karaniwan nilang trabaho ay  caregiver, hotel staff, o sa sektor ng agrikultura, serbisyo, at paggawa.

Lahat ng labor attaché at kanilang staff ay naka-duty na ngayon 24/7 at bawal na rin ang lahat ng leave at naka-standby ang mga hotline anumang oras.

Maaaring tumawag sa kanilang 24/7 hotline ang mga OFW at kanilang pamilya sa 1348 sa loob ng Pilipinas at +63 2 1348 mula sa labas ng bansa.

Siniguro ni Olalia na may mga nakahandang contingency measures ang pamahalaan kung sakaling lumala ang sitwasyon.

Naghanap na rin aniya ng alternatibong ruta ang DMW para sa repatriation dahil sarado ang airspace ng Israel at Iran.

“Kung hindi puwedeng air repatriation, gagawin natin ito sa pamamagitan ng land repatriation. Gagamit tayo ng mga kalapit na bansang bukas at ligtas para daanan ng ating mga OFW bilang bahagi ng humanitarian travel,” paliwanag ni Olalia.