DOT regional operation centers pinagana sa pagdagsa ng turista ngayong Mahal na Araw
MANILA, Philippines — Dahil sa inaasahang pagdagsa ng mga local at foreign tourist ngayong paggunita ng Mahal na Araw, pinagana ng Department of Tourism (DOT) ang kanilang mga regional operation centers sa buong bansa.
Sinabi ni Presidential Communications Undersecretary at Palace Press Officer Claire Castro na inaasahang halos tatlong milyong mga turista ang darating sa iba’t ibang destinasyon sa bansa.
Dahil dito kaya aniya ini-activate ng DOT ang kanilang regional operation centers upang tiyakin ang maayos na daloy ng mga turista, lalo na sa mga lugar na inaasahang dadagsain ngayong holiday season.
Pinaalalahanan naman ni Frasco ang mga biyahero na mag-book lamang sa mga DOT-accredited na establisimyento upang makaiwas sa mga scam at masigurong ligtas at may kalidad ang kanilang karanasan.
Batay sa tala ng DOT noong nakaraang taon, kabilang sa mga inaasahang top destinations ngayong Semana Santa ay ang Cebu, Bohol, Boracay, Palawan, Siargao, Baguio, Batangas, mga rehiyon ng Ilocos, Pampanga, Pangasinan, at Puerto Galera.
Lumalakas din ang interes ng mga turista sa mga umuusbong na destinasyon tulad ng Camiguin, Siquijor, at Cagayan de Oro. Ayon sa DOT, nakikita rin ang pagtaas ng interes sa Davao at Sarangani sa Mindanao.
Noong Mayo ng nakaraang taon, pinasinayaan ni Pangulong Ferdinand R. Marcos Jr. ang kauna-unahang Tourist Rest Area (TRA) sa Luzon na matatagpuan sa Pagudpud, Ilocos Norte bilang bahagi ng layunin ng bansa na maging tourism powerhouse sa Asya.
Sa kabuuan, umabot sa 5.94 milyong inbound visitors ang naitala ng bansa noong 2024, mas mataas ng 9.15 porsyento sa 5.45 milyon na naitala noong 2023, ayon sa DOT.
- Latest
