Mass protest sa LRT-1 fare hike nakaamba

MANILA, Philippines — Nagbabala si Akbayan Partylist Rep. Perci Cendaña sa Department of Transportation (DOTr) sa nakaambang ‘massive protest actions’ kung hindi ipatitigil muna ng Light Rail Manila Corporation (LRMC) ang P5-P10 taas pasahe sa Light Rail Transit (LRT) 1.

Ito’y kasunod ng inianunsyo ng LRMC na simula Abril 2, ang pinakamaikling LRT-1 trip ay P20 ­(dating P15) habang ang pinakamahabang biyahe ay P55 (dating P45).

Ayon kay Cendaña, ang hinihingi ng mga commuters ay i-extend ang operating hours ng LRT-1 pero ang ibinigay o itinugon umano ay dagdag pasahe at pasakit.

Nitong nakalipas na linggo ay inimbitahan ng Akbayan Partylist ang bagong talagang si DOTr ­Secretary Vince Dizon para sa dayalogo sa pangunahing mga isyu sa transportasyon ng mga commuters.

“Kung ico-compute, 200 to 400 pesos ang madaragdag sa monthly expenses ng ating mga commuter. Hindi makatao at maka-commuter ang ganitong uri ng polisiya,” dagdag ni Cendaña.