SC pinagkokomento Senado sa impeach trial vs VP Sara
MANILA, Philippines — Inatasan ng Korte Suprema ang Senado na maghain ng komento sa petisyong inihain ng isang abogado na humihiling na kaagad nitong simulan ang impeachment trial laban kay Vice President Sara Duterte.
Sa idinaos na en banc session kahapon, binigyan ng Korte ang Senado ng 10 araw na non-extendible period upang magsumite ng kanilang komento.
“Impeachment is a nationwide concern that will be treated with urgency because of the gravity of the matter,” pahayag ni SC spokesperson Atty. Camille Ting.
Matatandaang noong nakaraang linggo, hiniling ni Atty. Catalino Generillo Jr. sa SC na atasan ang Senado na kaagad na mag-convene bilang isang impeachment court at umpisahan na ang impeachment trial laban sa bise presidente.
Giit ng abogado, hindi pinahihintulutan ng Konstitusyon ang Senado na i-delay ang tungkulin nito sa panahon ng recess.
Una nang inaprubahan ng Kongreso ang impeachment at kaagad na iniakyat sa Senado noong Pebrero 5. Gayunman, hindi kaagad sinimulan ng Senado ang impeachment trial.
- Latest
