Sen. Bato nag-sorry sa pag-insulto kay Rep. Cendaña

MANILA, Philippines — Humingi ng paumanhin si Sen. Ronald “Bato” Dela Rosa nitong Linggo, kay Akbayan Rep. Perci Cendaña sa kanyang mga nakakasakit na pahayag kaugnay sa hitsura nito.

Inamin ni Dela Rosa na marami ang bumatikos sa kanya matapos niyang kutyain ang mukha ng Cendaña—isang stroke survivor—nang punahin ng huli si Vice President Sara Duterte dahil sa ginawang pagbalewala sa mga impeachment complaint laban sa kanya.

Nag-ugat ito nang magkomento si Cendaña sa pahayag ni VP Sara na “mas masakit ang iwan ng nobyo o kasintahan kaysa ma-impeach ng House of Representatives.”

“Gusto kong sabihin kay VP Sara: ‘Ate, hindi ito tungkol sa pagkakaroon ng manliligaw, kundi tungkol sa pananagutan at pananagutan sa publiko.

Dito, tumugon si Dela Rosa at tinuya si Cen­daña sa Bisaya na nagsabing: “Mukhang nasuntok ang mukha mo, kaya natulala...Halika dito para masuntok ko ang kabilang bahagi ng mukha mo at maging balanse.”

“Humihingi ako ng paumanhin para sa aking mga sinabi at ginawa, lalo na sa pagkabigong makita ang mas malaking larawan. Humihingi ako ng paumanhin kay Congressman Perci Cendaña sa aking mga nakakasakit na komento sa kanyang katauhan. I wish him good health,” sabi ni Dela Rosa.

Tinanggap naman ni Cendaña ang paghingi ng sorry ni Bato sa kaniya pero nais niyang humingi rin ito ng tawad sa iba pang mga stroke survivor.