Bakuna vs ASF, inindorso sa FDA
MANILA, Philippines — Nag-endorso na ang Bureau of Animal Industry (BAI) ng bakuna kontra African Swine Fever (ASF) sa Food and Drug Administration (FDA).
Ayon kay BAI Asst. Dir. Dr. Arlyn Vytiaco, naisumite na ng ahensiya sa FDA ang rekomendasyon nito para sa AVAC ASF Live Vaccine kontra ASF mula sa Vietnam.
Sinabi ni Vytiaco na nagkaroon muna sila ng serye ng vaccine field trial bago ito naindorso sa FDA at napatunayan nilang epektibo ang bakuna sa pagprotekta sa mga baboy laban sa ASF.
Ayon sa BAI, isinagawa mula Marso hanggang buwan ng Mayo ang clinical trials sa 6 na farm sa Luzon at lumabas ang positibong resulta.
Anya, sa safety at mefficacy trial, napatunayang ligtas ibakuna ang AVAC vaccine sa mga baboy kahit aabot pa sa 10 doses at wala ring namatay sa mga baboy na isinailalim sa trial at nakapag-produce rin ang mga ito ng antibodies na pangontra sa ASF.
Oras na may go signal na at maisyuhan na rin ng certificate of product registration ng FDA ang bakuna ay siniguro ng BAI na sisimulan na rin nito ang pagbuo ng TWG, pagbalangkas sa guidelines at rollout ng bakuna sa Pilipinas.
Binigyang diin ng BAI na mahalagang maumpisahan na ang immunization drive laban sa ASF para mapigilan ang pagkalat ng sakit na pumapatay sa mga alagang baboy at tuloy mapatatag muli ang domestic population ng babuyan sa bansa.
Sa tala ng BAI nitong June 1 ay aabot na sa 15 lalawigan sa 9 na rehiyon sa bansa ang may aktibo nang kaso ng ASF.
- Latest
