Komunikasyon sa ICC, ihinto na – Pangulong Marcos
Matapos ibasura ang apela ng Pinas
MANILA, Philippines — Itinigil na ni Pangulong Ferdinand “Bongbong” Marcos Jr. ang anumang uri ng komunikasyon sa International Criminal Court (ICC).
Ito’y matapos na ibasura ng ICC ang apela ng Pilipinas na suspendihin ang imbestigasyon sa anti-drug war campaign ni dating pangulong Rodrigo Duterte.
Hindi na rin aapela pa ang Pilipinas sa ICC, ayon sa Pangulo.
“We don’t have the next move... Hindi na tayo puwede mag-appeal. The appeal has failed and in argue, there is nothing more that we can do,” sabi ni Marcos.
Iginiit pa ng Pangulo na walang gagawing hakbang ang pamahalaan ng Pilipinas dahil wala namang hurisdiksyon dito ang ICC.
“We ended up with the same position that we started with and that is we cannot cooperate with the ICC considering there are very serious questions about their jurisdiction, “ giit pa ng Pangulo.
“We have not been involved with the actual action, merely as a comment, we would comment, and the appeal is part of a comment but we have not appeared as a party in the ICC because we don’t recognize the jurisdiction of the ICC. And so that is again as I said we have ended up now at the end where we really started,” dagdag pa ni Marcos.
Matatandaan na ikinasa ng ICC ang imbestigasyon dahil nauwi na umano sa crimes against humanity ang anti-drug war campaign ng nakaraang administrasyon.
Noong Marso 13 umapela ang Office of the Solicitor General na mabaligtad ang desisyon ng Pre-Trial Chamber ng ICC noong Enero na ituloy ang pag-iimbestiga sa ikinasang “war on drugs” ni dating Pangulong Rodrigo Duterte.
Kabilang sa kinuwestiyon ni Solicitor General Menardo Guevarra ang hurisdiksyon ng ICC gayung hindi nito miyembro ang Pilipinas.
Pero tinanggihan ng Appeals Chamber ng ICC ang apela ng gobyerno ng Pilipinas na itigil na ang pag-iimbestiga sa naging kampanya ng nagdaang administrasyon laban sa droga.
Sa naging desisyon ng ICC, nabigo umano ang Pilipinas na ipaliwanag ang kawalan ng hurisdiksyon. — Danilo Garcia
- Latest
