South Korea sasali na sa oil spill clean-up

MANILA, Philippines — Lalahok na rin ang gobyerno ng South Korea sa isinasagawang clean-up efforts sa oil spill sa Oriental Mindoro sa pagpapadala ng grupo ng mga eksperto at P11 milyong halaga ng mga equipment.

Ayon sa Korean Embassy, darating ang apat nilang eksperto mula sa Korea Coast Guard (KCG) sa Marso 27 upang makipagtulungan sa Philippine Coast Guard (PCG).

Dala nila ang 20 tonelada ng sorbent pads and snares, nasa 1,000 metro na ‘solid flotation curtain boom’, at 2,000 sets ng ‘personal protective equipment (PPE) para sa mga responders.  Nagkakahalaga ito ng US$210,000 o P11.4 milyon at darating naman sa Abril 5.

“For the oil spill in Mindoro, the Government of Korea has been closely working with the Philippine Coast Guard and decided to offer assistance in solidarity with the Philippines, including needed materials and support from the KCG Emergency Response Team,” ayon sa Korean Embassy.

Ang South Korea ang ikatlong bansa na nagbigay ng tulong sa Pilipinas laban sa oil spill dulot ng ­paglubog ng MT Princess Empress sa bayan ng Naujan sa Oriental Mindoro noong Pebrero 28.

Una nang nagbigay ng tulong ang Estados Unidos at Japan na nagpadala ng kanilang ‘unmanned robot’ na siyang nakatukoy sa aktuwal na kinaroroonan ng tanker.