Pangulong Marcos: Programa vs inflation, nakakasa na

MANILA, Philippines — Inaasahan ni Pangulong Ferdinand Marcos Jr. na bababa na ang inflation rate kasabay ng pagbaba ng presyo ng gasolina at mga inangkat na produktong agrikultura kahit pa tumaas ang inflation sa 8.7 porsiyento noong Enero 2023.

Sinabi ng Pangulo na nakalulungkot ang patuloy na pagtaas ng inflation, na ang mga hakbang na ipinatupad ng kanyang gobyerno ay “hindi pa dumaan sa sistema.”

“As I said, the importation of many of the agricultural products, which have been a large part of the inflation rate... we have already taken some measures so that the supply will be greater and so that will bring the prices down but that will take a little time,” ani Marcos.

Sinabi rin ni Marcos na base sa kanyang estimate o “forecast” bababa ang inflation sa ikalawang quarter ng taon.

Ipinunto rin niya na sa pagbaba ng presyo ng mga produktong petrolyo at mga produktong pang-agrikultura, patuloy na bababa ang inflation rate dahil sa kanyang paniniwala na: “this is going to be as high as it’s going to get.”

Ayon sa International Monetary Fund (IMF) January 2023 World Economic Outlook Update, ang inflation ay isang pandaigdigang problema na patuloy na magiging hamon sa mga bansa sa buong mundo.

Ayon din sa ulat, ang pandaigdigang paglaban sa inflation, ang digmaan ng Russia sa Ukraine, at ang muling pagkabuhay ng COVID-19 sa China ay nagpabigat sa pandaigdigang aktibidad sa ekonomiya noong 2022, at ang unang dalawang factors ay magpapatuloy sa 2023.

Ang naitala na inflation rate ng Pilipinas na 8.7% noong Enero 2023 ay mas mabilis kaysa sa 8.1% noong Disyembre 2022.

Ayon sa Philippine Statistics Authority (PSA), ito ay pangunahing nakaapekto sa pagtaas ng mga paupahang pabahay, singil sa kuryente at tubig, gayundin sa mga presyo ng mga gulay, gatas, itlog, prutas at mani.

Sinabi naman ng National Economic and Development Authority (NEDA) na ang administrasyong Marcos ay gumagawa ng mga hakbang upang mapanatili ang paggalaw ng presyo ng pagkain na naaayon sa inflation at food security objectives, na may mataas na agricultural productivity, food supply augmentation, at energy security.

Kabilang sa mga panandaliang hakbang ang pagpapalaki ng suplay tulad ng sa pamamagitan ng pansamantalang pagpapagaan ng mga paghihigpit sa pag-import, pagsubaybay sa presyo, at naka-target na suporta sa lipunan, habang ang medium-to long-term na mga priyoridad ay kinabibilangan ng pagtiyak ng seguridad sa pagkain sa pamamagitan ng mas mataas na produktibidad sa agrikultura at pagtiyak ng seguridad sa enerhiya sa pamamagitan ng pagpapatuloy ng paglipat ng enerhiya at programa sa pagpapaunlad.

Inaasahan ng mga economic manager ng Pangulo na magiging katamtaman ang inflation para sa 2023 hanggang 2024. — Angie dela Cruz