Employer ni Ranara, sinuspinde sa pag-hire ng Pinoy
MANILA, Philippines — Nagpalabas ng kautusan ang Department of Migrant Workers (DMW) para sa preventive suspension sa employer ng pinaslang na OFW na si Jullebee Ranara, na natagpuan ang sunog na bangkay noong Linggo sa disyerto sa Kuwait.
“Upon review of the case involved and with the existing facts we had, we filed, the Department of Migrant Workers filed ... the employer involved, and we already issued an order preventively suspending the employer of OFW Jullebee Ranara,” ani DMW Undersecretary Bernard Olalia sa isinagawang press briefing noong Biyernes.
Ito aniya, ay nangangahulugan na hindi pwedeng kumuha o mag-hire ang amo ni Ranara ng OFW ‘ngayon at kailanman’.
Ang preventive suspension ay hahantong sa isang blacklisting sa pagtatapos ng mga paglilitis, ani Olalaia.
Nakatakda na ring magsampa ng kaso ang DMW laban sa recruitment agencies ni Ranara dito sa bansa at sa foreign recruitment agency na sangkot.
Pupulungin din ng DMW ang lahat ng local recruitment agencies na nagpapadala ng mga Pinoy na household services workers sa Kuwait para talakayion ang mga isyu at problema hinggil sa deployment sa bansa.
Nabatid na ang 35-anyos na si Ranara ay ginahasa ng 17-anyos na anak ng amo, at natagpuan ang sunog na bangkay nito sa disyerto.
Kahapon ay iniuwi na sa bansa ang labi ni Ranara.
Nakalagay ito sa selyadong kahon lulan ng Emirates EK flight 334 na dumating sa NAIA terminal 1 bandang alas-9:40 kamakalawa ng gabi. — Butch Quejada
- Latest
