Pangulong Marcos, inalis bilang chairperson ng Maharlika Wealth Fund
MANILA, Philippines — Tinanggal na bilang chairperson na mangangasiwa sa Maharlika Wealth Fund (MWF) si Pangulong Ferdinand ‘Bongbong’ Marcos.
Sa pagdinig ng House Committee on Appropriations, sinabi ni House Senior Deputy Minority Leader at Northern Samar Rep. Paul Daza na ang Pangulo ay nasa “no-win” situation kapag pinamunuan nito ang board ng MWF.
Aniya, mapupulitika lamang ang pondo at malaking isyu kung ang Pangulong Marcos ang mamumuno dito.
“My personal opinion is we should layer and shelter the President because it’s a no win situation for the President to chair such a board,” ani Daza.
Sinabi naman ni House Committee on Banks and Financial Intermediaries chairperson at Manila Rep. Irwin Tieng, ang kalihim ng Department of Finance ang dapat na tumayong chairperson.
Paliwanag ni Tieng, ang 15-man board ay dapat na kinabibilangan ng apat na independent directors sa halip na dalawa lamang.
Dumalo rin sa pagpupulong si Appropriations committee vice chairperson at Marikina Rep. Stella Luz Quimbo.
Sa huling bahagi ng deliberasyon, sinabi ni Quimbo na binago ang komposisyon ng MWF Council upang mas madali itong maintindihan.
Ayon kay Quimbo, ang 15-member board ay bubuuin ng Finance secretary (chairperson), chief executive officer ng MWFC, mga pangulo ng Land Bank of the Philippines (LBP) at Development Bank of the Philippines, pitong regular member na mula sa mga fund contributors at apat na independent director mula sa pribadong sektor.
Nakatakdang talakayin ang amyenda sa MWFC Banks committee sa Lunes.
- Latest
