P5.268 trilyon 2023 national budget niratipikahan na ng Senado, Kamara

MANILA, Philippines — Niratipikahan na kagabi ng dalawang Kapulungan ng Kongreso ang Bicameral Conference Committee report sa panukalang P5.268 trilyong 2023 national budget ng pamahalaan.

Sa botong viva voce, nanaig ang pagkatig ng mga kongresista sa House Bill 4488 o ang General Appropriations Act.

Mismong si House Speaker Martin Romualdez ang nag-preside ng session nang ratipikahan ang 2023 GAB matapos ang isinagawang Christmas Lighting Ceremony.

Dahil dito, nakasisiguro na malalagdaan na ni Pangulong Ferdinand Marcos Jr. ang national budget sa target na hanggang bago mag-Pasko.

Sinabi ni House Speaker Martin Romualdez na ang niratipikahang P5.268 trilyong national budget ay kinapapalooban at tumutugon sa 8-point economic agenda ni Pangulong Marcos.

Ayon kay Romualdez, ang 2023 budget ay siguradong maghahatid ng tulong sa mga higit na nangangailangan at magpapabilis sa paglago ng ating ekonomiya.

Nakatakda namang ipadala kay Pangulong Marcos ang kopya ng pambansang pondo bago ito malagdaan bilang batas. — Gemma Garcia