OFWs, magbukas ng sariling negosyo - Marcos
MANILA, Philippines — Hinikayat ni Pangulong Ferdinand Marcos Jr. ang bawat OFW na magbukas ng sarili nilang negosyo.
Bagamat hindi nakadalo sa 2022 Go Negosyo OFW Summit, sinabi ng Pangulo sa isang kalatas na patuloy ang ginagawa ng pamahalaan sa pagsasaliksik sa entrepreneurship bilang plataporma para masiguro na makakaahon ang bansa mula sa matinding epekto ng COVID-19 pandemic.
Ang kontribusyon umano ng OFWs sa ekonomiya ng bansa at labor force ay nagsisilbing mahalagang elemento patungo sa pangmatagalan na kasaganaan at nananatili itong matibay na pundasyon ng ekonomiya.
“In today’s activities, we aim to make entrepreneurship an avenue where we can help OFWs and their families generate additional income to support their needs,” ayon pa kay Marcos.
Umaasa rin ang Pangulo na sa pamamagitan ng pagnenegosyo ay magkakaroon ng opsyon ang mga OFWs na bumalik dito sa bansa at magkaroon sila layunin na ang pagpunta sa ibang bansa ay “choice” lamang at hindi kinakailangan.
Ang Go Negosyo OFW Summit ay ginawa bilang bahagi ng pagdiriwang ng Go Negosyo sa kanilang ika-17 anibersaryo.
Dumalo rin sa naturang pagtitipon si First Lady Liza Araneta-Marcos at inanunsyo na may 9 na Kabayan Awardees ang makatatanggap ng P200,000 mula sa Office of the President (OP)
Ang Kabayan Awards ay ibinibigay para sa mga OFW na inspiring ang kwento sa kanilang pagtatrabaho sa ibang bansa.
- Latest