Diokno: Wala pang desisyon kung bibili ng Bivalent vaccines

MANILA, Philippines — Hindi pa umano nakakapag-desisyon ang gobyerno kung bibili ng second generation vaccines laban sa COVID-19 o ang Bivalent vaccines na magbibigay proteksyon laban sa Omicron variant.

Nilinaw naman ni Finance Secretary Benjamin Diokno na mayroong rekomendasyon ang Department of Health (DOH) para bumili ng nasabing bakuna.

“The decision to procure is not done yet,” ayon kay Diokno sa ginanap na Kapihan sa Manila Bay forum.

Nauna na rin sinabi ni DOH Officer-in-Charge Maria Rosario Vergeire, na nasa proseso pa sila ng negosasyon sa vaccine manufacturers na Moderna at Pfizer kaugnay sa pagbili ng Bivalent vaccines.

Umaasa naman si Vergeire na sa katapusan ng Disyembre 2022 o unang quarter ng 2023 ay ­available na sa bansa ang Bivalent vaccines.

Sinabi naman ni Diokno na sa hinaharap kapag hindi na nasa ilalim ng experimental status ang COVID-19 vaccines ay maaari na nitong bumili ang pribadong sektor.

Dati na rin sinabi ni Vaccine Expert Panel (VEP) Chief Dr. Nina Gloriani na ang pribadong sektor ay nais din bumili ng tinatayang 10 milyon doses ng ­second generation COVID vaccines.