Marcos, nag-aerial inspection sa pinsala ng super bagyo

MANILA, Philippines — Nagsagawa ng aerial inspection si Pangulong Ferdinand “Bongbong” Marcos Jr. sa mga lugar na naapektuhan ng super typhoon Karding pagkatapos pangunahan ang isang situation briefing sa National Disaster Risk Reduction and Management Council (NDRRMC) headquarters sa Quezon City kasama ang mga matataas na opisyal ng gobyerno.

Kabilang sa mga lugar na tiningnan ng Pangulo ang Bulacan, Nueva Ecija at Tarlac.

Sa kanyang account sa social media ay ibinahagi ni Marcos ang isang maikling video clip ng kanyang sarili sa loob ng chopper habang nagsasagawa ng aerial inspection.

Ipinaliwanag naman ni Marcos na hindi na siya bababa sa mga lugar na sinalanta ng bagyo upang hindi makaabala sa gawain ng mga local government units.

“I will not land in any place because from my experience pagka nasa local government ka lalo na just after the typhoon, marami silang trabaho. ‘Pag bumaba ako, kailangan nila akong i-welcome, kailangan ‘yung pulis sa akin, kailangan kukunin ko ‘yung mga sasakyan nila. Eh ang dami nilang kailangang gawin so makakaistorbo lang ako,” paliwanag ni Marcos.

Sinabi ni Marcos na parehong inuuna ng pambansa at lokal na pamahalaan ang pag-airlift ng mga food materials, food packs, at tubig sa Polillo Islands ng Quezon province, na naapektuhan ng mata ng bagyo na may malakas na hangin at ulan.