SRA chief, nagbitiw na rin
MANILA, Philippines — Nagbitiw na rin sa puwesto si Sugar Regulatory Administration (SRA) Administrator Hermenegildo Serafica sa gitna pa rin ng kontrobersiya sa importasyon ng asukal.
Sa isang pahinang liham ni Executive Secretary Vic Rodriguez kay Serafica na may petsang Agosto 15, 2022, nakasaad dito na tinanggap ni Pangulong Ferdinand Marcos Jr. ang kanyang resignation at ito ay “effective immediately”.
Kinumpirma naman sa Facebook post ni Press Secretary Trixie Cruz-Angeles na tinanggap ni Pangulong Marcos ang resignation letter nina Serafica gayundin ang pagbibitiw ni Atty. Roland Beltran ng Sugar Regulatory Board.
Si Serafica ang ikatlong opisyal ng SRA na nagbitiw sa gitna ng kontrobersyal na pag-iisyu ng Sugar Order No. 4 na nagpapahintulot sa pag-aangkat ng may 300,000 metrikong toneladang asukal.
Nauna nang nagbitiw si Agriculture Undersecretary Leocadio Sebastian at Atty. Beltran na kumakatawan sa sugar millers sa Sugar Board.
Iginiit ni Angeles na ang SRO-4 ay itinuturing na iligal dahil ang inisyu nilang resolusyon ay walang approval ni Pangulong Marcos na siyang tumatayo bilang Agriculture Secretary at siya rin chairperson ng board.
- Latest