924 bagong Omicron subvariants, nadagdag

MANILA, Philippines — Nakatukoy ang Department of Health (DOH) ng karagdagang 924 kaso ng mas nakahahawang Omicron subvariants sa pinakahuling genome sequencing.

Kabilang dito ang 906 kaso ng BA.5, 11 bagong kaso ng BA.4, at pitong BA2.12.1.

Ayon kay DOH officer-in-charge Maria Rosario Vergeire, umakyat na ang kabuuang kaso ng BA.5 sa 4,013, ang BA.2.12.1 ay nasa 181at 115 ang BA.4.

Inaalam pa ng DOH ang exposure at travel history ng lahat ng pasyente. Wala namang nadagdag sa unang 2 kaso ng BA.2.75 o Centaurus subvariant.

Sa mga bagong kaso ng BA.5, nasa 682 sa kanila ay fully-vaccinated na ngunit dinapuan pa rin ng virus, 14 ang partially vaccinated habang 210 ang bineberipika pa.

Nasa 814 sa kanila ang nakarekober, 49 ang nasa isolation pa habang inaalam ang estado ng 43 pang iba.