Fiscal Plan ni PBBM, makabubuti sa ekonomiya
MANILA, Philippines — Nakasunod sa ‘international best practices’ ang panukalang 2022-2028 Medium-Term Fiscal Framework (MTFF) ni Pangulong Marcos na inaprubahan ng Kamara.
Sinabi ito ni House Ways and Means chairman, Albay Rep. Joey Sarte Salceda, na siyang nag-sponsor ng ‘House Resolution No. 2’ na tina-lakay sa Kamara.
Inilarawan niya itong ‘codification’ ng kasunduan ng pamunuang Marcos at ng bayang Pilipino sa mga pangunahing layunin sa ekonomiya at pananalapi.
Ito anya ay tama at magandang hakbang kaugnay sa nalalapit na talakayan sa national budget.
Nakapaloob sa MTFF ang mahahalagang layunin sa ekonomiya at pananalapi na magiging gabay sa paglikha ng mga kailangang batas ng Kongreso.
Inilalahad nito ang near-term socio-economic agenda na patuloy na magpapatupad ng mga “risk-managed interventions” sa seguridad sa pagkain, enerhiya, transportasyon, pananalapi, kalusugan, proteksiyon ng mga mamamayan at mabisang burukrasiya.
Ayon kay Salceda, titiyakin ng MTFF ang patuloy at walang sagabal na mga ayuda sa mga mamamayan, pagpapagaan sa pagtaas ng ‘inflation’ o pagmahal ng mga bilihin, pagpapabilis sa pagbangon ng ekonomiya at pagtugon sa kaugnay nitong mga hamon. Layunin din nitong magsilbing ‘medium-term socio-economic agenda’ na lilikha ng higit na marami at may kalidad na trabaho para sa mga Pilipino.
- Latest