Joint US patrol sa West Philippine Sea, welcome sa Pinas

MANILA, Philippines — Malugod na tinanggap ng Pilipinas ang posibilidad na magsagawa ng magkasanib na pagpa-patrol kasama ang Estados Unidos sa West Philippine Sea na binanggit ang Mutual Defense Treaty ng dalawang bansa.

Ginawa ni Foreign Affairs Secretary  Enrique Manalo ang pahayag matapos matanong sa isang joint press briefing kasama si US Secretary of State Antony Blinken tungkol sa isyu ng joint patrol sa WPS.

“In our view, joint patrols between the Philippines and the United States can take place, they are under the ambits of the MDT, and also within the context of the Mutual Defense Board and Security Engagements Board,” ani Manalo.

Noong nakaraang taon ay nanawagan si dating top diplomat Albert del Rosario sa US at Pilipinas na magpakita ng “political will and commitment” na ipatupad ang kasunduan sa konteksto ng South China Sea.

Dumating si Blin­ken sa Villamor Airbase noong Biyernes ng gabi, kasunod ng kanyang pag­lahok sa U.S.-ASEAN Ministerial Meeting, sa East Asia Summit Foreign Ministers’ Meeting, at sa ASEAN Regional Forum sa Phnom Penh sa Cambodia noong nakaraang linggo.

Nagsagawa ng courtesy call si Blinken kina Pangulong Ferdinand Marcos Jr. at Manalo upang bigyang-diin ang pangako ng Washington sa bilateral na relasyon nito sa Pilipinas. Binanggit din ni Blinken ang pagpapahusay ng ugnayang pang-ekonomiya, renewable energy at agrikultura.

Tinalakay ni Manalo sa virtual presser na ang pakikipag-ugnayan ng depensa at seguridad ng Pilipinas sa US ay “patuloy na maging haligi ng ating bilateral na relasyon.”

Sa kanyang panig, muling inulit ni Blinken ang “iron-clad commitment” ng Amerika sa MDT.

Tiniyak din ni Blin­ken na “an armed attack on the Philippine armed forces, public vessels or aircraft in the South China Sea would invoke [commitments] under that treaty.”

Sa isyu ng Taiwan, binigyang-diin ni Blinken na ang Washington ay maninindigan sa mga ka-partner na bansa lalo na sa kasalukuyang sitwasyon sa Taiwan Strait.

Ang pagbisita ni Blin­ken sa Maynila ay kasunod ng pagbisita ni US House Speaker Nancy Pelosi sa self-governing island ng Taiwan na nagdulot ng tensiyon mula sa China.