Pasyente na may monkeypox, magaling na

MANILA, Philippines — Wala pang ibang kasong naitala ang monkeypox habang magaling na ang nag-iisang pasyente na naitala ng Department of Health (DOH).

Kinumpirma ni DOH officer-in-charge Maria Rosario Vergeire na natapos na ang huling araw o ika-21 araw ng isolation ng pasyente nitong Agosto 5.

Sa ngayon ay magaling na magaling na rin ang mga lesions ng pasyente.

Binigyan na rin aniya ng ‘go signal’ ng kanyang mga doktor ang 31-taong gulang na pasyente para makalabas na ng pagamutan nitong Sabado at makipag-interact sa kanyang pamilya at iba pang tao.

Sa ngayon aniya ay wala pa silang naitatalang bagong kaso ng monkeypox ngunit patuloy pa rin aniya nilang binabantayan ang mga close contacts ng pasyente.

Samantala, sinabi rin ni Vergeire na ang iba pang “suspected” patients ay nasuri na at nag-negatibo sa monkeypox.

Matatandaang ang naturang pasyente ay dumating sa bansa noong Hulyo 19 matapos na bumiyahe sa mga bansang nakapagtala na ng kaso ng monkeypox.

Kabilang sa mga sintomas ng naturang sakit ay lagnat, pananakit ng ulo, pananakit ng kalamnan, pagkapagal, pagkakaroon ng rashes, pamamaga at pananakit ng mga lymph nodes.