Publiko pinag-iingat ng POEA sa text scam na nag-aalok ng trabaho

MANILA, Philippines — Pinag-iingat ng Philippine Overseas Employment Administration ang publiko sa talamak na mga text messages na nag-aalok ng trabaho.

Ayon kay POEA Administrator Atty. Bernard Olalia, naglipana ang mga online scam na kahit ang POEA ay nadadamay.

Inamin din ni Olalia na maging siya ay hindi pinaligtas ng mga scammer at nakatanggap siya ng mensahe na siya ay naaprubahan sa kanyang puwesto at mayroon siyang job order sa POEA.

“Ako mismo po, nakatanggap ako na sinasabi doon sa text na natanggap ko sa aking cellphone na ako raw ay naaprubahan ang aking puwesto ‘no. Mayroon daw akong job order o job offer sa POEA. Eh paano mangyayari iyon eh ako mismo iyong administrator,” ani Olalia.

Pinayuhan ni Olalia ang mga makakatanggap ng mga text na huwag maniwala at lalong huwag bubuksan ang link upang hindi makunan ng impormasyon.

Iwasan na lang aniya ang mga nasabing text messages at mga online scams.