Kaso vs De Lima ibasura na sa pagbaliktad ng ika-4 na testigo — abogado
MANILA, Philippines (Updated 5:46 p.m.) — Winelcome ng kampo ni Sen. Leila de Lima ang counter-affidavit ng ikaapat na testigong bumawi sa testimonyang nagdidiin sa opposition lawmaker sa kalakalan ng droga — dahilan para muli nilang igiit ang pagbabasura ng drug charges.
Kamakailan lang nang baliktarin ni Marcelo Adorco, susing testigo ng gobyerno, ang kanyang mga alegasyon laban kay De Lima at self-confessed drug lord na si Kerwin Espinosa. Gaya ng iba pang mga testigo, iginiit ni Adorco na nagsalita lang siya noon dahil sa pangamba sa kanyang buhay at kaligtasan.
"Sa tingin namin, sumasalamin ito sa matagal na naming sinasabi na ang mga kaso laban kay Senator De Lima ay pawang gawa-gawa lamang ng mga taong tinakot at ginipit para gumawa ng kasinungalingan at palabasin na si Senator De Lima ay sangkot sa bentahan ng ilegal na droga," ani Filibon Tacardon, abogado ni De Lima.
"Lumalabas na ang totoo kaya patuloy ang panawagan namin sa [Department of Justice] na muling suriin ang mga kasong isinampa nila laban kay Senator De Lima at tuluyan nang ibasura ito at palayain ang mahal nating Senadora."
Una nang binawi nina Espinosa, dating Bureau of Corrections officer-in-charge Rafael Ragos at Ronnie Dayan ang kanilang mga pahayag laban kay De Lima na nagdidiin sa huli sa illegal drug trade sa Bilibid.
Pare-pareho nilang sinabing pinwersa sila ng Philippine National Police, dating Justice Secretary Vitaliano Aguirre II, atbp. na magsalita laban sa senadora. Sa kabila nito, itinatanggi ito ni Aguirre.
Umaasa naman si De Lima na maeengganyo nito ang iba pang aminin ang katotohanan upang mapatunayang walang sala patungkol sa mga reklamong ipinupukol sa kanya.
"As Duterte, the mastermind behind my unjust detention, is about to step down from power, we’ve seen the pattern of personalities finally speaking the truth and finding it in their conscience to retract their allegations implicating me in the illegal drug trade," sambit ni De Lima.
"Gaya ng lagi kong sinasabi: Naipakulong man nila ako, hinding-hindi nila maikukulong ang katotohanan na ako ay inosente. Lagi’t laging lalabas at mananaig ang katotohanan at hustisya."
Kilalang kritiko ng human rights record at madugong war on drugs ni Pangulong Rodrigo Duterte si De Lima.
Ngayong buwan lang nang sabihin ni incoming Justice Secretary Cavite Rep. Boying Remulla na bukas siyang i-review ang mga kaso laban kay de Lima.
Taong 2021 nang ibasura ng korte ang isa sa tatlong drug charges laban sa senadora. Limang taon na siyang nakakulong para sa mga nasabing reklamo.
- Latest