Duterte pinarerebyu ang Oil Deregulation Law
MANILA, Philippines — Sa gitna ng lingguhang pagtaas ng presyo ng langis dahil sa sitwasyon sa Ukraine, hiniling kahapon ng Malacañang sa Kongreso na rebyuhin ang Oil Deregulation Law.
Ayon kay acting presidential spokesperson Karlo Nograles, kabilang ang nasabing batas sa medium-term measures na napagkasunduan na i-review sa ginawang special meeting ni Pangulong Duterte sa matataas na opisyal ng gobyerno.
“For the medium term, we call on Congress to review the oil deregulation law, particularly provisions on unbundling the price and the inclusion of the minimum inventory requirements in the law, as well as giving the government intervention powers or authority to intervene when there is a spike and/or prolonged increase in prices of oil products,” ani Nograles.
Matatandaan na tinanggal sa nasabing batas ang kontrol ng gobyerno sa mga kompanya ng langis upang mas magkaroon ng kompetisyon at mapababa ang presyo ng mga produktong petrolyo.
Bagaman at nakabakasyon ang Kongreso at sa Mayo pa muling magbabalik ang sesyon maaari pa rin itong magbukas para sa special session kung ipapatawag ng Pangulo.
Sinabi rin ni Nograles na inaprubahan ni Duterte ang rekomendasyon ng kanyang economic team na palakasin ang lokal na ekonomiya, ma-stabilize ang presyo ng pagkain, makapamahagi ng mga fuel discount vouchers para sa mga magsasaka at mangingisda.
Tiniyak ng Pangulo na may gagawin ang gobyerno bilang tugon sa kaguluhan sa Ukraine na tiyak na makakaapekto sa bansa.
- Latest