Bagong kaso ng COVID-19, sumipa sa 37,207
MANILA, Philippines — Sumipa sa panibagong record high na 37,207 ang mga bagong kaso ng COVID-19 sa Pilipinas nitong Biyernes sanhi para umakyat ang kabuuang bilang ng kaso sa 3,129,512.
Ang mga pasyente na gumaling ay 9,027 o total recoveries na 2,811,188.
Nasa 81 ang nasawi o 52,815 death toll.
Naitala ang mga aktibong kaso sa 265,509.
Sa mga active cases, nasa 8,325 ang asymptomatic, 252,502 mild, 2,913 moderate, 1,469 severe, at 300 critical.
Sa buong bansa, naitala ang utilization rate sa ICU beds sa 46%, nasa 47% sa isolation beds, 48% sa ward beds, at 19% sa ventilators.
Sa Metro Manila, ang utilization rate sa ICU beds ay 55%, nasa 55% sa isolation, 67% ward, at 26% ventilators.
Samantala, patuloy umanong tataas ang mga kaso ng COVID-19 at maaaring umabot pa ang peak nito hanggang sa unang linggo ng Pebrero, ayon kay Health Undersecretary Maria Rosario Vergeire.
Dahil dito, inirekomenda ng DOH na iprayoridad ang mga health workers, matatanda at may comorbidities sa COVID-19 testing upang mabigyan kaagad sila ng tamang medisina sa maagang panahon.
Ikinokonsidera naman ngayon na “COVID probable” ang mga indibidwal na may sintomas ngunit hindi pa naisasailalim sa COVID-19 test. Pareho rin umano ang pamamahala sa COVID positive at probable na parehong dapat i-isolate.
Inamin ni Vergeire na hindi magagawang pigilan ng pamahalaan ang pagkalat ng coronavirus ngunit maaari namang maghanda sa pamamagitan ng paglalaan ng mas maraming higaan at intensive care unit beds sa mga pagamutan.
- Latest