NCRPO nakaalerto vs mass gatherings
MANILA, Philippines — Muling inalerto ni PNP Chief Gen. Guillermo Eleazar ang National Capital Region Police Office (NCRPO) na mahigpit na ipatupad ang pagbabawal sa mga mass gathering sa gitna ng banta ng Delta variant.
Bunsod ito ng babala ng OCTA Research group na posibleng tumaas ang kaso ng COVID sa mga dumadalo sa mga pampublikong pagtitipon.
Ayon kay Eleazar, nakakadismaya lamang na sa paulit-ulit na panawagan at paalala marami pa rin ang mga nasisita dahil sa hindi pagsunod sa health protocols.
Dapat aniyang magkaroon ng tulong mula sa publiko dahil hindi nakikita ang kalaban. Nauuwi pa rin sa sitahan at arestuhan ang pagpapatupad ng mga minimum public health standards.
Dagdag pa ni Eleazar, hindi mapapagod ang mga pulis na manita ng mga pasaway dahil mas natatakot ang mga pulis sa hawaan ng virus.
Naghihintay lang aniya ang PNP sa magiging desisyon ng pamahalaan ukol sa inirekomendang “circuit breaker” o dalawang linggong lockdown sa Metro Manila, para mapigilan ang pagtaas ng kaso ng COVID-19.
- Latest
