Uniform border controls vs Delta variant giit ng DOH

MANILA, Philippines — Iginiit ng Department of Health (DOH) ang uniform border controls para maitaboy ang nakahahawang Delta variant ng COVID-19 na unang natukoy sa India.

Sinabi ni Health Undersecretary Maria Rosario Vergeire na ang pamamaraang ito ay naging mabisa sa pagtukoy sa 13 COVID-positive Filipino seafarers na tinamaan ng nasabing variant.

“Ang pinakaimportante is our border control. Kailangan po pare-pareho ang ipatupad accross the regions at kung ano ang inirerekomenda natin base sa advice ng ating experts, ipatupad natin nang maayos,” ani Vergeire.

“Nakikita nating gumagana ang ating protocols dahil ang 13 taong may Indian variants na na-detect sa bansa na-detect natin ‘yan through protocols in the borders so sana ituloy natin itong mahigpit na border control para ma-prevent natin na it reaches our community,” dagdag niya.

Ang Delta variant ang nagpataas sa COVID-19 cases sa Australia at United Kingdom. Kapansin-pansin na ang mga tinatamaan nito ay mas mataas ang rate na maospital at mas matagal na confinement.

Gayunman, sinabi ni Vergeire na kailangan pa ng sapat na ebidensiya para makasiguro sa nasabing obserbasyon.

Una nang pinalawig ang travel ban sa layuning na hindi makapasok sa bansa ang nasabing variant.