Pagsita sa walang face shield tuloy - PNP
MANILA, Philippines — Tuloy ang paninita ng Philippine National Police sa mga hindi magsusuot ng face shield sa mga pampublikong lugar.
Ayon kay PNP Chief Gen. Guillermo Eleazar, ipatutupad pa rin nila ang rekomendasyon ng Inter-Agency Task Force (IATF) na paggamit ng face shield bukod pa sa face mask na proteksiyon laban sa virus na dala ng CoViD-19.
Aniya, pagsasabihan at paaalalahanan lamang ang mga lalabag. Hindi papatawan ng ano mang parusa ang mga hindi naka-face shield sa mga open at enclosed spaces.
Sinabi ni Eleazar na ang huling rekomendasyon ng IATF sa Pangulo ay panatilihin ang “mandatory” na pagsusuot ng face shield sa enclosed spaces, commercial areas, public transport, terminals at places of worship.
Wala pang guidelines na nagpapahintulot sa hindi pagsusuot ng face shield.
Hangga’t wala pa aniyang desisyon ang Pangulo ukol sa rekomendasyon, ay patuloy na umiiral ang kasalukuyang patakaran na magsuot ng face shield sa mga pampublikong lugar.
Marami rin naman aniya sa mga mamamayan ang nasanay na sa pagsusuot ng face shield, kaya yung mga mangilan-ngilan na hindi nagsusuot ay dapat lang paalalahanan.
- Latest