Duque iaapela kay Duterte ang pagpapatigil sa paggamit ng face shield
MANILA, Philippines — Aapela si Health Secretary Francisco Duque III kay Pangulong Rodrigo Duterte sakaling tuluyang ipatigil na ang paggamit ng face shield at gagamitin na lamang sa loob ng mga pagamutan.
Para kay Duque, naniniwala siya na anumang uri ng patong sa bibig at ilong ay mas mabisa upang hindi mahawa ng COVID-19 kaysa sa wala.
Sinabi ng kalihim na hindi pa umano ito ang oras para itigil ang paggamit ng face shield sa mga pampublikong lugar lalo na sa mga ‘enclosed areas’ dahil sa mababa pa ang bilang ng nababakunahan kontra COVID-19 sa bansa.
Una nang sinang-ayunan ni Health Undersecretary Leopoldo Vega na maaaring tanggalin ang face shields kapag nasa labas at isuot kung nasa loob ng mga ‘enclosed’ establishments, paaralan, opisina, pampublikong transportasyon at terminals, simbahan at iba pang pampublikong lugar na hindi maaaring makapag-physical distancing ng isang metro.
- Latest