PRC, magbebenta ng Moderna vaccines
P3,500 sa 2 dose
MANILA, Philippines — Plano ni Philippine Red Cross (PRC) Chairman at Senador Richard Gordon na ibenta sa publiko ang inorder nilang mga bakuna buhat sa pharmaceutical company na Moderna para mapabilis ang ‘vaccination’ ng mga Pilipino.
Sinabi ni Gordon na tinatayang nasa 200,000 doses ng Moderna na inorder nila mula sa Estados Unidos ang nakatakdang dumating sa susunod na buwan. Plano niyang ibenta ito sa halagang P3,500 para sa dalawang doses.
“If we are going to wait for the [government’s] vaccines to come, mahuhuli,” katwiran ni Gordon.
Sinabi ni Gordon na sa paghihigpit rin ngayon ng India sa pagpapalabas ng kanilang bakuna, mas magiging mahirap ngayon ang suplay nito.
“Those of you who cannot wait, you pay P3,500 and that’s 2 doses already,” ayon pa kay Gordon.
Puwede anyang magtungo sa Red Cross ang sinumang hindi makakahintay ng bakuna na inaalok ng gobyerno.
Nagpahayag naman si Gordon ng pagkontra sa ‘mass vaccination’ sa mga malalaking ‘vaccination centers’ na itatayo ng pamahalaan.
Ikinatwiran niya na maaaring magkahawa-hawa ang mga taong pipila para magpabakuna. Mas nararapat umano na magtayo ng mas maraming vaccination centers na mahigpit na pinamamahalaan at kontrolado ng mga health workers. — Gemma Garcia, Mer Layson
- Latest
