Paggamit ng AstraZeneca inumpisahan uli
MANILA, Philippines — Muling inumpisahan ng Department of Health (DOH) ang paggamit ng AstraZeneca vaccine makaraang tiyakin ng Food and Drugs Administration (FDA) na ligtas ito laban sa sinasabing ‘blood clot’ na side effect umano ng bakuna.
Ang paggamit ng AstraZeneca ay rekomendado ng FDA at ng DOH All Experts Group on Vaccines makaraan na unang suspendihin ang paggamit sa mga indibidwal na may edad 60-pababa dahil sa napakadalang na kaso ng Vaccine-Induced Thrombosis and Thrombocytopenia (VITT) o blood clotting.
“Based on current evidence, VITT is a very rare condition of blood clots associated with low platelet counts that can occur 4 to 28 days after receiving a viral vector vaccine such as AstraZeneca,” ayon sa DOH.
Sa kasalukuyan, wala pa namang naitatalang lokal na kaso ng VIIT sa bansa base sa kumpirmasyon ng National Adverse Events Following Immunization Committee (NAEFIC) at ng FDA.
Sa kabila nito, magpapatupad pa rin ang pamahalaan ng mga regulasyon para maiwasan ang maaaring panganib sa naturang bakuna.
Sinabi ng DOH na napapanahon ang muling pagpayag sa paggamit ng AstraZeneca dahil sa dalawang milyong doses nito na nakatakdang dumating sa bansa ngayong buwan.
- Latest
