7 barkong Tsino chumupi sa sita ng Coast Guard sa Sabina Shoal; Palasyo natuwa
MANILA, Philippines — Ikinagalak ng Malacañang ang balitang pagpapapalayas ng pwera ng Pilipinas sa maritime militia ng bansang Tsina, bagay na "patunay" daw sa pagsusumikap ng gobyernong protektahan ang exclusive economic zone (EEZ) ng Pilipinas.
Ngayong araw nang mabalitang napaalis ang pitong Chinese maritime militia vessels sa Sabina (Escoda) Shoal 73 milya mula sa Mapankal Point, Rizal, Palawan noong ika-27 ng Abril matapos radyuhan ng Philippine Coast Guard (PCG).
Ikinatuwa naman 'yan ni presidential spokesperson Harry Roque sa panayam kanina ng media.
"'Yan ho ang administrasyon ni Presidente Rodrigo Roa Duterte," pagdidiin ni Roque habang ipinagmamalaki ang bagay na PCG naman ang may gawa.
"Sa administrasyon ni Albert del Rosario noong siya ay nasa [Department of Foreign Affairs], tayo ang pinapalayas. Pero noong kay President Duterte, tayo ang nagpapalayas."
Kamakailan lang nang makapalitan ng salita ni Roque sina Del Rosario at retired Supreme Court justice Antonio Carpio dahil sa diumano'y laging mapagkompromisong linya ni Pangulong Rodrigo Duterte sa pag-okupa at paggamit ng Beijing sa West Philippine Sea — kahit EEZ ito ng Pilipinas.
Ilang araw na kasing sinasabi ng Palasyo na okey lang sa kanila na mangisda sa loob ng EEZ ng Pilipinas ang Tsina sa Pilipinas, habang daan-daang barkong Tsino ang natatagpuan sa loob ng West Philippine Sea. Sinabi rin ni Duterte noong Lunes na wala siyang pangakong kukunin uli sa Tsina ang mga nasabing dagat.
"China has been taking away our land and waters. We would like to ask, Mr. Secretary [Roque], why our fellow Filipinos are being chastised for wanting to defend our country, rather than China? Why are we giving more importance to China over that of our own people?" ani Del Rosario noong Linggo.
Paano napaalis?
Ayon kay National Security Adviser at National Task Force for the West Philippine Sea (NTF-WPS) chair Hermogenes Esperon Jr., napaalis ang pitong Chinese militia ships habang nagpapatrolya ang BRP Cabra, MCS 3002 at 3004 ships ng Bureau of Fisheries and Aquatic Resources noong April 27.
"The crew of BRP Cabra issued a series of challenges to the offending vessels, but elicited no response from the CMMs. After around 20 minutes, however, the CMMs vessels dispersed and left the shoal after being challenged by BRP Cabra," ani Esperon.
Ito raw mismo ang mensaheng ipinadala ng BRP Cabra sa mga barkong Tsino nang mangyari ang harapan:
"This is Philippine Coast Guard BRP Cabra (MRRV-4409). You are within Philippine exclusive economic zone," wika ng coast guard.
"PCG and BFAR followed the sailing of the ships to ensure that the Chinese maritime militia vessels left Sabina Shoal... The Philippines is not deterred from defending our national interest, patrimony, and our dignity as a people with all that we have," dagdag pa ni Esperon.
'Hindi makakaapekto sa relasyunan'
Nanindigan naman si Roque na hindi raw maaapektuhan ng nasabing paghaharap ang mainit na pagkakaibigan ng Pilipinas at Tsina, kahit na kahapon lang ay nanindigan ang Chinese Foreign Ministry na "kanila" ang Panatag (Scarborough) Shoal.
"Wala ho, kasi ho kung titignan ninyo kung saan nangyari ang insidente... Malinaw po, nasa loob 'yan ng ating [EEZ] at napalakapit po sa Palawan. Walang kaduda-dua po, tayo lang ang may karapatan," sabi pa niya.
"Ang pinanindigan po ng presidente, walang teritoryong mawawala sa administrasyon niya at 'yon ang ipinatutupad ngayon." — may mga ulat mula kay Patricia Lourdes Viray
- Latest
