Tinamaan ng COVID-19 tumaas ng 8,748 sa Pilipinas; kaso umabot sa 1.03-M

MANILA, Philippines — Nakapagtala ang Department of Health ng 8,748 bagong infection ng coronavirus disease, Biyernes, kung kaya nasa 1,037,460 na sumatutal ang nahahawaan nito sa bansa.

Batay sa mga bagong nakalap na datos ng Kagawaran ng Kalusugan, narito ang bagong mga pasok na datos para araw na ito:

• Lahat ng kaso: 1,037,460
• Nagpapagaling pa: 73,908, o 7.1% ng total infections
• Kagagaling lang: 4,143, dahilan para maging 946,318 na lahat ng gumagaling 
• Kamamatay lang: 89, na siyang nag-aakyat sa total local death toll sa 17,234

Anong bago ngayong araw?

• Ibinalita naman ni Philippine Ambassador to Russia Carlos Sorreta kanina na bumabiyahe na papuntang Pilipinas ang mga unang doses ng Russian COVID-19 vaccine na "Sputnik V" ng kumpanyang Gamaleya. Inaasahang darating ng Pilipinas ang mga bakuna sa Sabado.

• Kinumpirma naman ni presidential spokesperson Harry Roque na ititigil na ng gobyerno ng Pilipinas ang "travel ban" nito sa mga dayuhang nais pumunta ng Pilipinas simula bukas. Aniya, alinsunod na rin 'yan sa kapapasa lang na Resolution 113 ng Inter-Agency Task Force on the Management of Emerging Infectious Diseases.

• Ikinabahala naman ng Philippine Pharmacists Association ang isinagawang pamimigay ng ivermectin nina Sagip party-list Rep. Rodante Marcoleta at Anakalusugan party-list Rep. Michael Defensor kahapon kontra COVID-19. Maliban sa hindi pa tiyak kung mabisa ito sa virus, hindi rin daw kumpleto ang mga impormasyong dapat na matatagpuan sa mga resetang ipinakita para makakuha ng gamot.

• Kaugnay ng nasabing gamot, na walang batayan kung epektibo laban sa COVID-19 ayon mismo sa manufacturer nito na Merck, ipinaalala ni Pasig City Mayor Vico Sotto na huwag basta-basta magpapaniwala sa mga "conspiracy theories" at sa halip makinig sa mga aktwal na medical experts.

• Umabot na sa 149.21 milyon ang tinatamaan ng COVID-19 sa buong daigdig, ayon sa huling datos ng World Health Organization. Sa bilang na 'yan, patay na ang mahigit 3.14 milyong katao.

— James Relativo