Bagong hawa ng COVID-19 sa bansa nasa 7,379, pinatalon mga kaso sa 953,906

MANILA, Philippines — Nakapagtala ang Department of Health (DOH) ng 7,379 bagong infection ng coronavirus disease Martes, kung kaya nasa 953,906 na sumatutal ang nahahawaan nito sa bansa.

Batay sa mga bagong nakalap na datos ng Kagawaran ng Kalusugan, narito ang bagong mga pasok na datos para araw na ito:

• lahat ng kaso: 953,906
• nagpapagaling pa: 127,006, o 13.3% ng total infections
• bagong recover: 21,664, dahilan para maging 809,959 na lahat ng gumagaling 
• kamamatay lang: 93, na siyang nag-aakyat sa total local death toll sa 16,141

Anong bago ngayong araw?

• Kinumpirma ng Food and Drug Administration (FDA) ngayong araw na iniutos ni Pangulong Rodrigo Duterte ang clinical trials ng "Ivermectin" laban sa COVID-19. Ito'y para lalong mapag-aralan ito bilang posibleng treatment, sa kabila ng babala nila ng DOH na maaari itong makasama pa sa kalusugan ng tao.

• Ibinahagi naman ni Philippine Ambassador to the US Jose Manuel "Babe" Romualdez na maaaring dumating sa Pilipinas ang Pfizer COVID-19 vaccines simula buwan ng Mayo.

• Inilinaw naman ni presidential spokesperson Harry Roque na pinalawig ang pamamahagi ng ayuda para sa mga naapektuhan ng lockdown hanggang ika-15 ng Mayo.

• Kaugnay niyan, sinabi rin ni Romualdez na magsisimulang dalhin ang Moderna COVID-19 vaccines sa Pilipinas sa ika-15 ng Hunyo hanggang matapos ang 2021. Una nang nag-commit ng 20 milyong vaccine supply ang kumpanya sa Pilipinas ngayong taon.

• Umaabot na sa halos 141.1 milyon ang tinatamaan ng COVID-19 sa buong mundo, ayon sa huling ulat ng World Health Organization (WHO). Sa bilang na 'yan, 3.01 milyon na ang patay. 

— James Relativo at may mga ulat mula kina Christian Deiparine, Xave Gregorio at The STAR/Alexis Romero