8,571 bagong hawa ng COVID-19 sa Pilipinas naitala; kaso nasa 884,783 na
MANILA, Philippines — Nakapagtala ang Department of Health (DOH) ng 8,571 bagong infection ng coronavirus disease (COVID-19) ngayong Martes, kung kaya nasa 884,783 na sumatutal ang nahahawaan nito sa bansa.
Batay sa mga bagong nakalap na datos ng Kagawaran ng Kalusugan, narito ang bagong mga pasok na datos para araw na ito:
- lahat ng kaso: 884,783
- nagpapagaling pa: 165,534, o 18.7% ng total infections
- bagong recover: 400, dahilan para maging 703,963 na lahat ng gumagaling
- kamamatay lang: 137, na siyang nag-aakyat sa total local death toll sa 15,286
Anong bago ngayong araw?
-
Umaasang makakukuha ang Pilipinas ng 20 milyong doses ng Sputnik V COVID-19 vaccine ng Rusya sa susunod na apat na buwan, pagbabahagi ng ni vaccine czar Carlito Galvez Jr. sa panayam ng ABS-CBN News Channel kanina. Kabilang na riyan ang 500,000 unang doses na darating ng bansa ngayong buwan.
-
Bukod pa riyan, sinabi pa ni Galvez na nakatakdang pirmahan ng gobyerno ang supply agreement kasama ang Johnson & Johnson para sa 6 milyong COVID-19 vaccines ngayong linggo. Nire-regotiate na rin daw ng estado ang 25-40 milyong doses ng COVID-19 vaccines mula sa Pfizer.
-
Nasa 194,000 doses naman ng Moderna COVID-19 vaccines ang inaasahang darating ng Pilipinas sa susunod na buwan ng Mayo. Bahagi ito ng 13 milyong bakuna na in-order ng gobyerno at 7 milyon ng pribadong sektor.
-
Kinumpirma naman ng Justice Secretary Menardo Guevarra na kasama na rin ang mga prosecutor ng Department of Justice (DOJ) sa A4 priority vaccinees ng gobyerno — ang susunod na nakapila sa jabs laban sa COVID-19. Una nang sinabi ng National Economic and Development Authority (NEDA) na posible itong maiturok sa Mayo o Hunyo sa nasabing sektor.
-
Umaabot na sa halos 135.64 milyon ang tinatamaan ng COVID-19 sa buong mundo, ayon sa huling ulat ng World Health Organization (WHO). Sa bilang na 'yan, mahigit-kumulang 2.93 milyon na ang patay.
— James Relativo
- Latest