Public transpo, limitado pa rin sa APORs - DOTr
MANILA, Philippines — Mananatili pa ring limitado sa mga authorized persons outside of residence (APORs) ang mga pampublikong transportasyon sa NCR Plus areas, kahit pa isinailalim na ito ng pamahalaan sa modified enhanced community quarantine (MECQ), ayon sa Department of Transportation.
“Tanging mga APOR lamang po ang papayagang sumakay sa mga pampublikong sasakyan,” abiso ng DOTr.
Inianunsiyo rin ng DOTr na simula ngayong araw, Abril 13, ay magbubukas pa sila ng 60 karagdagang ruta para sa public utility jeepneys (PUJs) sa National Capital Region (NCR) at 190 ruta pa para sa provincial public utility buses simula sa Abril 15.
Tuluy-tuloy rin ang kanilang free rides sa mga health workers at medical frontliners, gayundin ang libreng sakay para sa mga APORs gamit ang jeepneys at buses na nag-o-operate sa ilalim ng service contracting program.
Tulad noong ECQ implementation na walang naganap na taas-pasahe kahit may reduced capacity ang mga PUVs, tiniyak muli ng DOTr na wala ring magaganap na fare increase ngayong nasa MECQ na ang NCR Plus.
Kamakalawa ay inianunsiyo ng Malacañang na ang NCR Plus areas, na binubuo ng Metro Manila at mga lalawigan ng Bulacan, Rizal, Cavite, at Laguna ay isasailalim na sa MECQ mula Abril 12-30.
- Latest
