Crematorium naniningil ng doble sa pamilya ng mga namatay sa COVID-19
MANILA, Philippines — Naniningil umano ng doble ang mga crematorium sa pamilya ng mga namatay sa COVID-19 partikular sa Metro Manila.
Base sa nakuhang impormasyon ni House Deputy Minority Leader at Bayan Muna Rep. Carlos Isagani Zarate sa mga pamilya ng namatayan, kung P25,000 ang singil sa crematorium kapag namatay umano sa COVID ay P50,000 pataas ang singil bukod pa sa mistulang metro ng taxi na storage fee dahil sa mahabang pila.
Sinabi ni Zarate na hindi lamang sa mga ospital mahaba ang pila ng mga pasyenteng may COVID na nais magpa-admit kundi maging sa mga crematorium ay pila balde rin ang mga bangkay.
Ang National Capital Region (NCR) ay isa sa mga itinuturing na COVID hot zones sa bansa dahil sa mataas na kaso ng virus.
“Dapat ihinto ang ganitong kalakaran at huwag naman po sanang pagkakitaan pa ang trahedyang nangyari sa mga kababayan natin na napalalaki na nga ng ginastos sa ospital at ngayon nadagdagan pa ng malaking gastusin sa pagkamatay ng kanilang mahal sa buhay,” ani Zarate.
- Latest